اک رات دیاں مہماناں دی مہمان نوازی کر زینبؑ
کل ڈیگر ویلے ظالماں نے تیرا لٹنا اے وسدا گھر زینبؑ
کل ماں اصغرؑ دی اصغرؑدے پینگے کول بہہ کے رونا اے
ایدے پتر دی نازک گردن وچ جدوں حرمل تیر پرونا اے
اصغرؑ دیاں سکیاں بُلیاں نے کل ہونا اے لہو نال تر زینبؑ
کل گود ربابؑ توں وکھ ہوکے صحرا وچ اصغرؑ سونوے گا
کِنے لوریاں دیکے چکنا اے رات نو ڈر کے رووے گا
ایس نازک پُھل نے ریتاں دی گرمی نال جانا اے سڑ زینبؑ
ایس خونی ریت دے ٹبیاں تے تیرے سہریاں والے مرنے نے
اک رات چہ وس کے اجڑی نے کُج وین انوکھے کرنے نے
جدے نہ ساہورے نہ پیکے ریئے اینے جانا اے کہڑے گھر زینبؑ
تیرے سہرےاں والے بنڑے دی کل لاش تے لوٹی پینی اے
دن ڈھلن توں پہلا کبرہٰ دے ہتھاں اُتوں مہندی لہنی اے
اک رات دی ویاہی بنری دا کل داج وہ جانا اے سڑ زینبؑ
جدوں پُتر جوان دے سینے چوں شاہ برچھی نوں ہتھ پانا ایں
تک بڈھڑے پیو دیاں صبراں نوں نبیاںؑ دا دل گھبرانا ایں
جیڑی آساں لا کے بیٹھی اے اُوس بہن نے جانا اے مر زینبؑ
کل صامن تیری چادر دا دریا اُتوں واپس آنا نیئں
فیر شمرتوں سین سکینہؑ نوں تیرے غازی ویر چھڑانا نیئں
تیرے ویرن علماں والے نے دریا اُتے جانا اے مر زینبؑ
تیری ماں دے وسدے گلشن نوں جدوں لٹنا آن لعیناں نے
کر یاد عبّاسؑ نوں رات ویلے فیر رونا بال یتیماں نے
تینوں قبر دے وچ وی نئیں بھلنا کل رات دا او منظر زینبؑ
تیرے ویر قرآنِ ناطق نے ہو زخمی رہئیل اُتوں لہنا ایں
تیری چادر لُٹ کے ظالم نے تینوں چھڑکاں دیکے کہنا ایں
تیرے مان تے سارے ٹُٹ گئے ہُن شام تیاری کر زینبؑ
کل اکبرؑ دی جاگیر وچوں تینوں ملنا اے اجر رسالت دا
جنوں لوک سقیفہ کہندے نے او مرکز شام ذلالت دا
انج لگدا اے توں رُلنا اے وچ شام دے بن چادر زینبؑ
ایس گل دا کوئی ارمان نئیں تیرے اکبرؑ اصغرؑ مر گئے نے
تیرا ویر عبّاسؑ جوان گیا نالے خیمے اگ وچ سڑ گئے نے
تیرے ہتھ وچ رسیاں پینیاں نے توں ہونا اے ننگے سر زینبؑ
تاریخ دے ہر اک ورق اُتے تیرا قیدن نام ایناں لکھنا ایں
کائینات دی ہر اک بی بی نے تیرے درتوں پردہ سکھنا ایں
افسوس بنی دی اُمت نے تینوں رُولنا اے در در زینبؑ
کوئی صبر خلیلؑ سناو¿ندا کوئی صبر یعقوبؑ نوں روندا اے
کُج مار کے چیکاں روندے نے جدوں نام ایوبؑ دا آو¿ندا اے
تیرے ویر غریب دے صبراں نوں اساں رونا اے گھر گھر زینبؑ
توں بہن اٹھاراں ویراں دی کل بن چادر دے ہونویں گی
جس ویر توں جوڑی واری توں اونوں خاک تے بہہ کے رونویں گی
تیرے ویرن پاک نمازی دا سر سانگ تے جانا اے چڑھ زینبؑ
نیئں لوڑ مینوں کوئی جنت دی سردار اے رو رو کہنہ اے
وس پیندیاں اکھیاں اُوس ویلے جدوں ناں عبّاسؑ دا لیندا اے
وچ محشر دے ایدے علم تھلے اساں رونا اے نوحہ پڑھ زینبؑ
شاعر: سردار یوسف (التماسِ سورة فاتحہ) نوحہ خواں سنگت : ناصر اصغر پارٹی انجمن شباب المومنین
http://www.matamdari.com
تبصرہ کریں